វិធីរកលុយតាមហេ្វសបុក (Facebook)

 

ប្រសិនបើអ្នកចង់រកលុយពីហ្វេសបុក តើមានវិធីណាខ្លះដែលអ្នកអាចទាញយកប្រយោជន៍ពីហ្វេសបុក ហើយអាចរកលុយបាននោះ។​ ជាទូទៅការរកលុយជាមួយហ្វេសបុកអាចមានច្រើនវិធី ប៉ុន្តែថ្ងៃនេះសប្បាយលក់សូមលើកឡើងតែ ៨ចំណុចប៉ុណ្ណោះ៖

១-រកទំនិញមកដាក់លក់នៅលើ (Facebook Marketplace)

អ្នកអាចប្រើផ្សារហ្វេសបុក (Facebook Marketplace)​ ដើម្បីទិញនិងលក់ទំនិញជាមួយមនុស្សក្នុងសហគមន៍របស់អ្នកតាមហ្វេសប៊ុក។ ប៉ុន្តែអ្នកត្រូវស្វែងរកមុខទំនិញជាក់លាក់ណាមួយ ដើម្បីដាក់លក់នៅលើទីផ្សារនេះ។ សូមបញ្ជាក់ថាមុខទំនិញដែលអាចដាក់លក់បាននៅលើទីផ្សារហ្វេសបុក ត្រូវតែគោរពតាមគោលការណ៍របស់ហ្វេសបុក។

 

២-ជួយលក់ទំនិញនៅលើហ្វេសបុក (Affiliate Marketing)

​ពាក្យ​ថា  Affiliate Marketing គឺជាវិធីរកលុយតាម Internet មួយបែប ដោយយើងមិនបាច់ចំណាយអ្វីទាំងអស់ ប្រសិនបើអ្នកមានប្លុក ឬវេបសាយផ្ទាល់ខ្លួន។ ការរកលុយតាមបែប Affiliate Marketing គឺប្រៀបដូចជាការជួយលក់ទំនិញឲ្យអ្នកដទៃ ឬក្រុមហ៊ុនណាមួយ បន្ទាប់ពីលក់បានជោគជ័យយើងនឹងទទួលបានប្រាក់កំរៃជើងសារ។ តើធ្វើដូចម្តេចដើម្បីរកលុយតាមបែប Affiliate Marketing? (ដើម្បីឆ្លើយតបនឹងសំនួរខាងនេះ សប្បាយលក់នឹងលើកឡើងនៅពេលក្រោយទៀតអំពី Affiliate Marketing)។

 

៣-ផ្សព្វផ្សាយលក់ទំនិញនៅលើគណនីហ្វេសបុកផ្ទាល់ខ្លួន (Facebook Account)

ចំពោះអ្នកមានផលិតផលលក់ផ្ទាល់ខ្លួនស្រាប់ អាចជ្រើសរើសវិធីផ្សព្វផ្សាយ លក់ទំនិញនៅលើគណនីហ្វេសបុកផ្ទាល់ខ្លួន ប៉ុន្តែដើម្បីទទួលបានប្រសិទ្ធិភាពនោះ អ្នកគួរធ្វើការ Add Friends អោយបានច្រើនរហូតបានដល់ ៥.០០០នាក់ជាមុនសិន ព្រោះមានមិត្តហ្វេសបុកច្រើន មានន័យថានៅពេលយើងផុសលក់អ្វីមួយអាចនឹងមានអ្នកមើលឃើញច្រើន ហើយវាជួយឲ្យអ្នកឆាប់លក់ទំនិញបាន ដោយប្រើគណនីហ្វេសបុកផ្ទាល់ខ្លួន។

 

៤-លក់ហ្វេសប៊ុកផេក (Page Like)

បច្ចុប្បន្នសង្កេតឃើញថា ការលក់ទំនិញអនឡាញកំពុងតែមានការពេញនិយមខ្លាំងឡើងៗ ហើយអ្នកស្វែងរកទិញផេកដើម្បីយកទៅធ្វើអាជីវកម្មលក់ទំនិញអនឡាញក៏មានកាន់តែច្រើន។ ដូចនេះអ្នកអាចបង្កើតផេក រួចធ្វើផេករបស់យើងអោយទទួលបានអ្នកគាំទ្រច្រើន​ បន្ទាប់មកអ្នកនឹងអាចផ្សព្វផ្សាយលក់ផេកនោះ ក្នុងតម្លៃណាមួយ ដោយតម្លៃផ្អែកទៅតាមទំហំអ្នកគាំទ្រផេក (Like Page)។

 

៥-រកលុយពីពាណិជ្ជកម្មហ្វេសបុក (Facebook Ads)

ប្រសិនបើអ្នកមានជំនាញចេះបង្កើតវិដេអូ ដែលអាចទាក់ទាញឲ្យមានអ្នកមើលបានច្រើន អ្នកនឹងអាចរកប្រាក់បានពី Facebook Ads ដោយការបញ្ចូលការផ្សាយពាណិជ្ជកម្មក្នុងស្ទ្រីម (Video Stream) ឧទាហរណ៍ ការផ្សាយពាណិជ្ជកម្មវីដេអូខ្លីៗ ឬរូបភាពនៅក្នុងវីដេអូស្រ្ទីមរបស់អ្នក ។

 

៦-គ្រប់គ្រងហ្វេសបុកឲ្យអ្នកដទៃ ឬក្រុមហ៊ុន (Admin Facebook Page)

ក្រៅពីការលក់ទំនិញអនឡាញនៅលើហ្វេសបុក ឬជួលលក់ផលិតផលអោយគេនៅលើហ្វេសបុក អ្នកក៏អាចរកលុយពីការជួយគ្រប់គ្រង់ហ្វេសបុកផេក (Faceboook Page) ឲ្យបុគ្គល ឬក្រុមហ៊ុនបាន ប្រសិនបើអ្នកមានជំនាញលើការគ្រប់គ្រងហ្វេសបុកផេកច្បាស់លាស់ ហើយត្រូវទទួលបានការជឿទុកចិត្តនោះ។

 

៧-បង្កើតក្រុម (Group)

ទន្ទឹមនឹងការបង្កើតផេកដើម្បីលក់ផេក (Like) អ្នកអាចសាកល្បងបង្កើតក្រុម សម្រាប់ទិញលក់ប្រភេទទំនិញណាមួយជាមួយគណនីហ្វេសបុករបស់អ្នក ដោយការផ្សព្វផ្សាយ និងបើកទំលាយជាសាធារណៈ (Open Group) ដើម្បីឲ្យមានអ្នកចូលរួមក្នុងក្រុមបានយ៉ាងងាយស្រួល។ បន្ទាប់ពីទទួលបានសមាជិកក្នុងក្រុមច្រើនក្នុងកំរិតមួយ អ្នកអាចបិទក្រុម (Close Group) ក្នុងនាមអ្នកជាអ្នកគ្រប់គ្រងក្រុម (Admin Group) អ្នកនឹងទាញប្រយោជន៍បានពីការផ្សាព្វផ្សាយពាណិជ្ជកម្ម ឬលក់សិទ្ធគ្រប់គ្រងរបស់អ្នកទៅអោយអ្នកផ្សេងបាន។

 

៨-ផ្សព្វផ្សាយដោយផ្ទាល់ (Live Video) 

បច្ចប្បន្នការផ្សាយផ្ទាល់ដើម្បីលក់ទំនិញអនឡាញបានរីកដុលដាលដូចផ្សិត ព្រោះគ្រាន់តែអ្នកបើកហេ្វសបុក​ភ្លាមក៏ឃើញអ្នកផ្សាយផ្ទាល់លក់ទំនិញស្ទើរគ្រប់ពេលវេលា និងមានគ្រប់ប្រភេទមុខទំនិញ។ សម្រាប់អ្នកដែលគាត់មានជំនាញ (Live Video) អាចរកលុយបានពីរផ្លូវ គឺទីមួយ ការលក់ទំនិញខ្លួនឯង និងទីពីរ គឺផ្តល់សេវាកម្មផ្សាយផ្ទាល់លក់ទំនិញឲ្យអ្នករកស៊ីអនឡាញខ្លះ ដែលគាត់ពុំមានជំនាញ ហើយត្រូវការជួលអ្នកផ្សាយផ្ទាល់ដើម្បីជួយលក់ទំនិញគាត់ ។

 

​
អ្នកនិពន្ធ:​កូនទា​​